Route-Bysser Fasnacht 2026: Mir draje sälber!

Wett ych nohn em Schaffe dehaime tschille,
montier ych zerscht mi Färnseh-Brülle,
hol denn e Bier und due duuresträäle,
was vo Netflix ych söll wääle. 

Die biete e soone Huffe Serie aa,
(die maischte sinn vo den USA)
i  mag kuum noche mit konsumiere, 
es duet mi fascht scho irritiere,
uss wellne abvereggte Sache, 
NETFLIX kan e Serie mache:

Drugge si sälber Gäld in Spanien unde,
ischs Thema für e Serie scho gfunde! 
Wotsch wüsse wie d Queen duet jasse,
gits säggs Staffle «Crown» - jo nid verpasse!
Wottsch luege wie Mensche bim Spiile  mien stärbe,
denn gesch mit «Squid Games» das Verdäärbe.
Wenn de e Maischterdieb willsch gseh bim Stääle,  
Denn sotsch «Lupin» uff gar kai Fall verfääle. 
Gsesch gärn diggi Fraue wo dien schmuuse,
denn lauft das uf «Bridgerton»-Serie uuse!
Finnsch d Stadt Paris und d Liebi toll?
Denn bikunsch mit dr «Emily» e Laadig voll. 
E Serie über Gängs mit Gwalt und Macht,
het NETFLIX mit «Peaky Blinders» gmacht. 
Imene Lehrer si Lääbe lauft uss de Fuege,
muesch aifach e Bitz «Breaking Bad” go luege.

E Frölein wo Schach spiilt und s Beschti git,
findsch bi NETFLIX under «The Queens Gambit”.
Oder gsesch e Mogge Flaisch mit ere rote Sosse,
isch e Serie mit eme Spitaal – eme grosse. 
Au ibers Wissi Huus mit em Presidänt
gits e Serie – doch die isch z änd!
Es liggt kai näggschti Staffle uff em Tisch,
will d Realität no vyl vereggter isch!

Kurz: Für jeedi Situation im Lääbe
Duet NETLIX e Serie asträäbe!


Doch ai Thema gits bi NETFLIX nit,
und das finde mir nid so der Hit,
s Thema Fasnacht in unsrer Stadt,
findet bi NETFLIX überhaupt nid statt. 

Kaini Gängschter-Gschichte mit de Gugge!
Kai Katastrophe-Serie - wägg em Ummedrugge!
Kai Liebes-Story  wägem steile Drummler.
Kai Serie iber die alte Route-Bummler!
Kai «Pfyfferin-liebt-Dambuur»-Gschicht,
Kai «Obmaa-isch-abgwäält-wäge- Drooge»-Bricht!
Kaini «Dambuur-Majore-Breakdown»-Folge!
Kai Blagedde-Usswahl wo kasch verfolge.

Nüt, gar nüt das isch e Schand!
Mir Route-Bysser findes allerhand!


Dorum beschliesse mir: «Mr draie sälber!»
Und zaiges däne NETFLIX-Kälber

Mit “House of Räppli” föhn mr aa!
(mir hänn scho die erschti Sitzig gha!)
Und wenn die Staffle im Kaschte sitze,
duet scho die näggscht Idee uffblitze!
«Drive to Survive “ mit Motoore, so lutte,
heisst neu:  «Traktor faare iber d Route!»
Und statt dr Queen mit dr Kroone in dr Hand,
gits e Serie iber s Comité am Stroose-Rand!
Uff unsrer Lischte gits no meh
Wo me in unsrem Programm ka gseh:
E Mini-Serie iber d Schnitzelbängg
E Doku-Folg: «Wo gits s dyyrscht Gedrängg?»
E Kurz-Serie iber Mimoose-Pflääge
Oder e Bligg ins Lääbe uff de Wääge.
Oder d Serie: Drei Dääg in de Gasse – 
Oh wie duen ych dr Donnschtig hasse!

Mir hänn Idee und zwar e baar,
und doorum isch das für uns klaar:
NETFLIX – das isch nimme gfroggt 
(die hänn ys sowieso abzoggt)!
Ab jetzt kasch ohni finanzielle Schaade,
E Serie bi de Route-Bysser aabelade!

Autor: Daniel Thiriet